SAN VALENTÍN

JEROBIBLIO convoca'l

I CERTAME POÉTICU "SAN VALENTÍN".

Escribi'l to poema d'amor y métilu nel cofre de San Valentín na biblioteca.

COSES DE LA GÜELA

CUNTÓMELO MIO GÜELA

Esta Historia ocurrió va munchu tiempo nel mio pueblu. Mio güela diba a llavar a la fuente El Escorial con unos baldes na testera enllenos de ropa puerco y encontróse con una amiga que diba tamién a llavar. Fueron xuntes y nuna curva del senderu sintieron un ruíu y miraron pal bardial y ellí vieron una vieya de tez escura: yera María Cuchiella que venía a buscar a daquién pa llevala con ella. Mio güela y la so amiga asustáronse muncho y coles oreyes p’abaxo y el calderu na tiesta, echaron a correr pa casa ensin parar. Cuntáron-yoslo a tolos del pueblu.
Nadie les creía, hasta qu’a otra mujer-y pasó lo mesmo, pero nesti casu fue al llau de so casa, pero enverde nun bardial ellí taba al llau d’una parva cuchu. Dende esi día nunca más la volvió ver nadie, nin nel pueblu nin pel camín de la fuente.

Paula Iglesias Rodríguez. 4º C


Y LA MÍA TAMIÉN

Una vecina de Pueblu Nuevu en Peñarrolla (Córdoba) ofreció-y a la Virxen poner un hábitu si curaba a so pá. Pero el pá morrió y la rapaza nun puso l’hábitu. Cuando l’home marchaba a trabajar, ella quedaba en casa colos cuatro fíos; ellos durmiendo nuna habitación y ella n’otra. Mientres ella dormía, aparecía so pá y pizcábala y dicía-y que tenía que poner l’hábitu. Cuntó-ylo al home y nun la creyó. L’home pensó que tendría un queríu.
Caviló l’home cómo pdría enterase y decidió nun dir a trabajar y espiala. Un día fizo como que diba a trabajar pero dio la vuelta y fue pa casa a ver si la mujer lu taba engañando con otru, pero la mujer taba durmiendo. La mujer entamó a dar voces porque ellí taba so pá otra vez, pero l’home salió d’onde taba escondíu y preguntó-y por qué gritaba si ellí nun había nadie (él nun vía a so suegru). Esta vez el pá dixo-y que si ponía l’hábitu ya nun saldría más y asina descansaríen los dos.
Punxo l’hábitu y so pá nunca más volvió a salir.

Jessica de la Torre Lozano. 4º A Diver

EL QU'AVISA...

Ya llegó setiembre y tamos equí otra vez.

El martes 12 entama un cursu nuevu, otru diferente pa la mayoría de vosotros y tenemos munchos meses per delantre pa facer collacios nuevos, pa trabayar, pa facer actividaes estraescolares,...

Los llibros de l'asignatura d'asturiano son los mesmos que los del añu anterior y tán disponibles nes llibreríes.

¡¡¡BIENVENÍOS/ES TOOS Y TOES!!!

LLEGUEN LES VACACIONES

Termínase'l cursu 2005-06 y tenemos per delantre dos meses de vacaciones... pa descansar abondo, porque setiembre llega ensín pensar y entama otru cursu.
¡¡¡BONES VACACIONES A TOOS Y A TOES!!!

I JEROALCUENTRU NARRATIVU

Los ganadores del I Jeroalcuentru Narrativu son:
1º CICLU D'ESO
1.- Aitana Vega (1º B)
2.- Sara García (1º B)
3.- Andoni Legazpi (1º B)

2ºCICLU D'ESO
1.- Lucía Fernández Murillo (3º C)
2.- Alba Cabricano Canga (3º C)
3.- Plácido Gómez Sánchez (3º C)

BACHILLERATO
1.- Ariadna Antón Blanco (2º A)

ACTIVIDAES

El martes 25 d'abril, na capilla, hai cuentacuentos de Montse Garnacho, col siguiente horariu:

- de 12:30 a 13:30, 1º d'ESO

- de 13:30 a 14:30, 2º d'ESO

El xueves 27 d'abril, na capilla, Montse Garnacho presenta la so obra lliteraria pa 3º y 4º de la ESO de 13:30 a 14:30.

El vienres 5 de mayu, na capilla, hai llectura de poemes, tanto n'asturianu como en castellanu y puen lleer toles persones que quieran.

CUENTOS DE CALEYA

Yá acabemos les vacaciones, pasó la Selmana Santa, pasaron los Güevos Pintos y el martes 18 entamaron les clases.

La selmana que vien celebramos la Selmana del Llibru (el Día del llibru ye'l 23 d'abril) y a lo llargo d'esa selmana los escolinos d'asturianu vamos recibir una visita especial: Montse Garnacho va a facemos un cuenta-cuentos especial. Montse va a pasar peles nueses clases a cuntamos "Cuentos de Caleya", una serie de cuentos que-y cuntaron a ella peles "caleyes" d'Asturies y qu'ella mos va a cuntar a nosotros.

SELMANA DEL LLIBRU

Del 23 al 28 d'abril celébrase la Selmana del Llibru nel IES, coles siguientes actividaes:
- Esposición de los "eternos clásicos"
- I Jeroalcuentru Narrativu
- Cuenta-cuentos de Montse Garnacho
- Presentación de la obra de Montse Garnacho
- Recital artísticu: poesía-música-imaxen

¡¡¡ANÍMATE Y PARTICIPA!!!

COSADIELLA

Nel periódicu del centru EL JERONIMÍN, nel númberu 1 del pasáu mes d'Avientu salía una cosadiella:

"Va montáu nun burru,

ye baxu, gordu y con panza

amigu d'un caballeru

d'escudu y llanza,

sabe cosadielles, ye llistu.

Aldovina, aldovinanza....

¿Quién ye?

El prósimu día 30 de Xineru, DÍA DE LA PAZ, nel segundu recréu va sortease un regalu ente los qu'acertastéis la solución y mandastéis la papeleta col resultáu.

¡¡¡SUERTE!!!

TRABAYOS

A tolos escolinos de llingua asturiana:

Alcordaivos que tenéis que facer el trabayu de los llibros pa esti mes de xineru.

¡¡¡Queden pocos díes!!!

LLECTURA 1º E.S.O.

ROSA QUIER OTRA COSA de Maite G. Iglesias, con debuxos d'Ana Rodríguez Pastor cuenta aventures d'una neña a la que nun-y gusten les moñeques!!!

LLECTURA 2º E.S.O.

¡NUN-YOS TENGAS PERCEGUERA! de Sidoro Villa Costales son una riestra de poemes cortos sobre animalucos que normalmente mos dan perceguera como la sacavera, el cachiparru, la culiebra, ...

LLECTURA 3º E.S.O.

MARUXES Y XUANES de Montserrat Garnacho ye una obra de teatru qu'ella escenificó con alumnos y cola que ganó diferentes premios. Un tema afayadízu, pocos personaxes y munchos datos sobre l'escenariu faenmos vivir la hestoria como si participásemos d'ella.

LLECTURA 4º E.S.O.

CUANDO SE PRESENTA LA OCASIÓN (El formientu y la sal) continúa l'otru llibru anterior de Montserrat Garnacho: "La sal y el formientu". Son un puñadín de cuentiquinos populares que l'autora dramatizó pa facer teatru con ventiún guajes na escuela.

FOTOGRAFIANDO LES MATEMÁTIQUES

I CONCURSU DE FOTOGRAFÍA "I.E.S. JERÓNIMO GONZÁLEZ"

¿Tiés cámara de fotos?
Pues ¡¡¡ A SACA-Y PARTÍU!!!
Participa nel concursu. NUN te costará na.



Bases:
- La temática de les fotos participantes deberá tar relacionada con cualquiera de los múltiples aspeutos de les matemátiques (paralelismos, simetríes, figures, etc.), análisis (converxencies, diverxencies), probabilidá, estadística, etc.

- Pués entregar les fotos convencionales a cualquiera de los profesores de matemátiques del Institutu o bien, si SON DIXITALES, unviales per corréu electrónicu en formatu "jpg", "gif", "avi", ... a la siguiente direición: jeromate@hotmail. com. LES FOTOS PARTICIPANTES DEBEN LLEVAR TÍTULU.

- Cada participante pue unviar tres fotos como másimo y debe identificase de forma clara en cada foto que concurse.

- El plazu d'entrega de fotografíes finaliza'l 28 de Febreru de 2006.

- El xuráu tará formáu polos alumnos de 4º d'ESO de TALLER DE MATEMÁTIQUES.

- La foto que gane'l primer premiu recibirá 30 euros y la que gane'l segundu premiu recibirá 20 euros, a invertir en material escolar.

- Toles fotos participantes publicaránse na páxina web del Institutu y na revista dixital.

- La entrega de premios fadráse durante les xornaes culturales.

LES VACACIONES DE NAVIDÁ

Les vacaciones de Navidá entamen el día 21 d'Avientu de 2.005 cola entrega de notes a les 11:30 y finarán el día 9 de Xineru de 2.006. Alcordáivos de venir pa les 8:30 bien descansaos, porque ¡ENTAMEN LES CLASES!

GRAN PREMIU A LA MEYOR AULA

Ta en marcha dende l'aniciu de cursu un GRAN PREMIU FIN DE CURSU A LA MEYOR AULA, teniendo en cuenta : la llimpieza, el cuidáu y l'orde del aula y del pasiellu.
Nel cursu 2005/06 entregaráse a un únicu cursu'l premiu a la meyor aula. Valoraráse'l respetu pol material, la llimpieza, l'orde (ente clas y clas, durante les mesmes y al finar), si se recueyen les sielles enriba les meses al finar el día,...
Informaráse periódicamente de los resultaos.
¡¡¡SUERTE A TOOS/ES!!!

ESTI YE'L NUESU CENTRU

PRIMER MENSAXE

Bienveníos toos al nuevu periódicu dixital del nuesu centru qu'entama a espublizase guéi 21 de payares de 2005.